Mae Cymdeithas Llywodraeth Leol Cymru (CLlLC) wedi canmol cyflawniadau myfyrwyr ledled Cymru wrth iddynt dderbyn eu canlyniadau TGAU a chymwysterau Galwedigaethol a Thechnegol Lefel 1 a 2heddiw.

Bydd mwy na 310,000 o bobl ifanc yn derbyn eu canlyniadau eleni, gan nodi carreg filltir arwyddocaol yn eu taith addysgol a chydnabod yr ymdrech a'r penderfyniad y maent wedi'u dangos trwy gydol eu hastudiaethau.

Mae data cychwynnol yn dangos bod 96.9% o fyfyrwyr wedi sicrhau graddau A*-G, gyda 62.5% yn cyflawni graddau A*-C. Mae'r meysydd pwnc mwyaf poblogaidd eleni yn cynnwys Gwyddoniaeth, Saesneg a Mathemateg.

Dywedodd y Cynghorydd Lis Burnett, llefarydd CLlLC ar faterion Addysg:

"Mae hwn yn ddiwrnod mawr i filoedd o bobl ifanc ledled Cymru, ac rwyf am ddweud da iawn i bawb sy'n codi eu canlyniadau. Beth bynnag yw eich cynlluniau nesaf, byddwch yn falch o ba mor bell rydych chi wedi dod - rydych chi wedi ei ennill.

"Y tu ôl i bob canlyniad mae llawer iawn o ymdrech, nid yn unig gan fyfyrwyr ond gan athrawon, staff cymorth a theuluoedd hefyd. Diolch i bawb sydd wedi helpu pobl ifanc i gyrraedd y pwynt hwn.

"Os nad ydych chi'n siŵr beth i'w wneud nesaf neu os oes angen rhywun i siarad â nhw, peidiwch ag anghofio bod cefnogaeth allan yna. Gall Gyrfa Cymru, eich ysgol neu'ch coleg eich helpu i archwilio'r holl opsiynau – boed hynny'n fwy o astudio, gwaith, neu rywbeth hollol newydd."

"Rydym hefyd am fynegi ein diolch diffuant i'r holl staff addysg a chymorth ledled Cymru am eu hymroddiad a'u gwaith caled wrth feithrin talentau, hyder a dyheadau pobl ifanc, gan eu helpu i gyrraedd eu potensial a chymryd eu camau nesaf."