Arfer Da gan y Cyngor

Ffrind mewn Angen (CBS Pen-Y-Bont ar Ogwr)

Fri, 23 Apr 2021 13:09:00 GMT

Yn ystod pandemig Covid-19 fe weithiodd Cyngor Bwrdeistref Sirol Pen-y-Bont ar Ogwr ochr yn ochr â Chymdeithas Gwirfoddol Sefydliadau Pen-y-Bont ar Ogwr (BAVO) i ymestyn y cynllun Cymdeithion Cymunedol gan gydnabod yr angen i addasu dulliau mewn cysylltiad â’r pandemig a chyfyngiadau. Roedd Cymdeithas Sefydliadau Gwirfoddol Pen-y-Bont ar Ogwr a’r Cyngor eisiau darparu cefnogaeth i unigolion mewn ffyrdd gwahanol, yn cynnwys cyfeillio dros y ffôn i ddarparu cefnogaeth o bell, gan dargedu oedolion hŷn sydd wedi’u hynysu dros gyfnod y gaeaf. Yn ystod 2020, derbyniwyd 229 o atgyfeiriadau ar gyfer cefnogaeth cyfeillio. Cefnogwyd 145 o unigolion gyda chyfleoedd cyfeillio, ac roedd 102 o wirfoddolwyr yn rhan o brosiect cyfeillio dros y ffôn a 50 o unigolion yn rhan brosiect treialu cyfaill gohebol. Parhaodd y cynllun cyfaill gohebol rhwng cenedlaethau i dyfu er gwaethaf yr amhariadau gyda’r ysgolion yn cau ac mae’r Cymdeithas Sefydliadau Gwirfoddol Pen-y-Bont ar Ogwr wedi creu cysylltiadau gydag ysgol gynradd lleol yn ystod y cyfnod clo i ysgrifennu llythyrau/darluniadau y datblygodd Cymdeithas Sefydliadau Gwirfoddol Pen-y-Bont ar Ogwr y rhain mewn i gardiau post i’w hanfon at fuddiolwyr a gwirfoddolwyr Cymdeithion Cymunedol.

Gwirfoddoli yng Nghymuned Sir Fynwy (CS Fynwy)

Wed, 03 Mar 2021 15:27:00 GMT

Roedd Cyngor Sir Fynwy a sefydliadau’r trydydd sector wedi gweithio gyda’i gilydd yn ystod y cyfnod clo cyntaf ym mis Mawrth 2020 i ddatblygu strwythur cefnogi ar gyfer grwpiau cymunedol. Roedd y strwythur cefnogi yn cynnwys hyfforddi a sgrinio gwirfoddolwyr ar gyfer diogelu, rhannu gwybodaeth, datblygu rhwydweithiau cymdogaeth ac un pwynt mynediad yn y cyngor fyddai’n gallu cynorthwyo’r grwpiau gydag unrhyw heriau yr oeddent yn eu hwynebu. Roedd egwyddorion seiliedig ar ased a chred ac ymddiried mewn cymunedau yn sylfeini strategaeth y cyngor ar gyfer rheoli’r cyfnod clo. Roedd cryfder perthnasoedd y cyngor gyda’r grwpiau cymuned presennol a grwpiau cymorth cydfuddiannol newydd yn golygu bod y cyngor yn gallu cael budd drwy gefnogi’r cymunedau mewn llawer mwy na siopa a chasglu presgripsiynau. Mae’r math hwn o ddull o dan arweiniad y gymuned ac wedi’i lywio gan berthynas bersonol wedi ysbrydoli creu Rhaglen Llysgennad y Dref newydd y sir. Wedi’i drefnu gan gynghorau tref, gyda chefnogaeth y cyngor sir a Chymdeithas Mudiadau Gwirfoddol Gwent, mae’r rhaglen yn gweld gwirfoddolwyr lleol yn cwrdd gyda’r sawl sy’n teimlo’n ansicr am adael eu cartrefi a cherdded gyda nhw o amgylch canol y dref. Mae’r gwirfoddolwyr yn derbyn hyfforddiant fel y gallant roi cyngor am fesurau Covid-19 sydd ar waith o amgylch canol y dref a’r siopau, sgwrsio am les cyffredinol ac arwyddbostio i wasanaethau lleol.

Mae manylion pellach wedi’i gasglu mewn Astudiaeth Leol Newydd (Ion 2021): Symud y Cydbwysedd: Addasu'n lleol, arloesi a chydwithio yn ystod y pandemig a thu hwnt

Ysbryd Cymunedol Gwynedd (Cyngor Gwynedd)

Wed, 03 Mar 2021 14:29:00 GMT

O fewn pythefnos cyntaf y cyfnod clo ym mis Mawrth 2020, roedd dros 600 o bobl wedi cofrestru i wirfoddoli gyda Banc Gwirfoddolwyr Mantell Gwynedd Roedd Cyngor Gwynedd a chyrff trydydd sector yn cynnal cyfarfodydd ar-lein ffurfiol ac yn gweithio gyda’i gilydd yn fwy cyfunol i wasanaethu anghenion cymunedau drwy nodi bylchau, rhannu adnoddau a chamu i fyny i’r galw. Er bod natur gwirfoddoli wedi newid ers y cyfnod clo cyntaf gyda llawer o bobl yn dychwelyd i’r gwaith neu i addysg, mae’r ysbryd gwirfoddoli wedi parhau. Roedd llawer o’r bobl oedd wedi cofrestru’n wreiddiol i wirfoddoli gyda Mantell Gwynedd ar ddechrau’r cyfnod clo cyntaf wedi estyn allan i wirfoddoli eto yn ystod y Cyfnod Atal Byr yn yr Hydref.

Mae manylion pellach wedi’i gasglu mewn Astudiaeth Leol Newydd (Ion 2021): Symud y Cydbwysedd: Addasu'n lleol, arloesi a chydwithio yn ystod y pandemig a thu hwnt

Gwasanaeth Cymorth Cymunedol Conwy (CBS Conwy)

Mon, 12 Oct 2020 13:39:00 GMT

Sefydlodd Cyngor Bwrdeistref Sirol Conwy linell gymorth y Gwasanaeth Cymorth Cymunedol (GCC) ym mis Mawrth 2020, a'i bwrpas oedd darparu cymorth i unrhyw un yn y gymuned nad oedd yn gallu galw ar ffrindiau, teulu neu gymdogion i ofyn am help i wneud siopa, danfon meddyginiaeth ac ati. Darparwyd cymorth i ddechrau trwy baru gwirfoddolwyr ac yna fe symudon ni ymlaen i ddefnyddio staff a adleoliwyd dros dro o wasanaethau eraill yn y cyngor. Anogwyd gwirfoddolwyr i gofrestru gyda Chymorth Cymunedol a Gwirfoddol Conwy (CVSC) i gael eu paru â sefydliadau lleol. Mae gan CBS Conwy gytundeb â nifer o siopau lleol a’r ddwy siop Tesco yn y sir i gymryd taliad dros y ffôn gan unigolion sy'n defnyddio'r GCC ar gyfer ceisiadau siopa. Pan fydd Staff Conwy wrth y til, mae'r siop yn ffonio'r cwsmer sydd wedyn yn talu am ei siopa dros y ffôn. Mae yna broses mewn lle hefyd i gynorthwyo os nad oes gan unigolion fodd i dalu gyda cherdyn dros y ffôn. Mae'r gwasanaeth GCC wedi'i ostwng yn unol â llacio’r rheolau clo ac mae nifer y ceisiadau a dderbyniwn yn lleihau. Mae pob meddygfa a fferyllfa wedi cael gwybod ac wedi cael eu hannog i gofrestru gyda'r Groes Goch os oes angen cymorth arnynt i ddosbarthu presgripsiynau.

Cefnogi Pobl Ddiamddiffyn Ynysig drwy'r Cynllun Cyfeillio (CBS Caerffili)

Mon, 12 Oct 2020 12:58:00 GMT

Yn ystod y drydedd wythnos ym mis Mawrth fe ysgrifennodd CBS Caerffili at y 70,000 a mwy o aelwydydd yn y fwrdeistref sirol yn cynnig cefnogaeth i bobl oedd yn pryderu am gyngor Llywodraeth y DU i rai dros 70 oed, neu bobl sydd â chyflwr iechyd sy'n bodoli eisoes, i hunan ynysu os oeddent yn teimlo na fyddent yn gallu ymdopi gyda siopa dyddiol neu gasglu presgripsiynau. Fe gysylltodd 1560 o bobl hŷn a diamddiffyn â’r llinell gymorth bwrpasol yn gofyn am gefnogaeth. Ar yr un pryd galwyd ar staff i weithredu os oeddent yn gallu helpu fel gwirfoddolwyr er mwyn darparu ymateb ar unwaith. Yn y diwedd daeth 590 aelod o staff i weithredu fel Cyfeillion a chawsant eu paru gyda hyd at 10 o oedolion/teuluoedd diamddiffyn yr un. Gan fod mynediad at arian yn anodd, ac nad oedd unrhyw ganllawiau gan CGGC yn bodoli ar y pryd, sefydlwyd mynediad at gardiau credyd corfforaethol ac arian mân ar fyr rybudd i atal honiadau o gamdriniaeth ariannol a thwyll. Roedd preswylwyr yn derbyn anfoneb yn ddiweddarach am siopa a brynwyd ar eu rhan. Ar yr un pryd darparodd y Cyngor yrwyr oedd wedi derbyn gwiriad uwch y GDG i fferyllfeydd lleol i helpu gyda dosbarthu meddyginiaeth gan nad oedd y gwasanaethau gyrwyr arferol yn weithredol. Wrth i’r cyfnod clo lacio ac wrth i bobl roi’r gorau i warchod eu hunain mae nifer o staff wedi parhau i gynnal rôl cyfeillio gyda’r bobl y maent wedi bod yn eu cefnogi. Mae’r cynllun nawr yn gweithio gyda’r sector gwirfoddol a grwpiau cymunedol lleol i gefnogi’r nifer llai o bobl sy'n parhau i fod angen cefnogaeth drwy'r Tîm Adfywio Cymunedol sy'n gweithio gyda'r Cyngor Gwirfoddol Sirol lleol. Mae Cydlynydd Gwirfoddolwyr a benodwyd ar y cyd yn helpu i reoli’r Cynllun Cyfeillio gyda’r bwriad o ddatblygu cynllun gwirfoddoli corfforaethol mwy ffurfiol. Mae’r Tîm Adfywio Cymunedol yn gweithio’n agos gyda grwpiau gwirfoddol COVID yn y gymuned leol yn arbennig o ran helpu pobl ynysig sydd wedi cofrestru ar y Cynllun Cyfeillio i fod â gwell cysylltiad â’u cymunedau.

Gyda’n gilydd rydym yn brwydo yn erbyn y Coronafeirws Covid-19 (Cyngor Sir y Fflint)

Wed, 17 Jun 2020 09:00:00 GMT

Mae Cyngor Sir y Fflint wedi bod yn gweithio mewn partneriaeth gyda Chyngor Gwirfoddol Lleol Sir y Fflint (FLVC) i sicrhau bod pobl ddiamddiffyn yn derbyn y gefnogaeth briodol. Cyn Covid-19, roedd gan (FLVC) fynediad i gyfeiriadur o fudiadau cymunedol cymeradwyedig h.y. bod y sawl a gyfansoddwyd wedi derbyn hyfforddiant priodol, a bod polisïau ar waith, megis diogelu. Mae’r Cyfeiriadur yn cael ei ddiweddaru wrth i grwpiau cymunedol newydd sefydlu. Mae FLVC yn cyflogi dau aelod o staff o fewn y tîm Un Pwynt Mynediad (SPoA), sy’n cyfeirio ac yn cefnogi unigolion i gael mynediad i’r gefnogaeth gwirfoddol a chymunedol sydd ar gael ar draws Sir y Fflint. Mae aelodau o staff sydd ar ffyrlo o fudiadau sy'n gweithio'n agos gyda'r Cyngor wedi cael eu hannog i wirfoddoli drwy wefan Gwirfoddoli Cymru. Mae dros 200 o bobl wedi cofrestru i wirfoddoli yn Sir y Fflint, gydag 84 o unigolion yn dewis gwirfoddoli i’r cyngor, yn ogystal â chynnal hyfforddiant rhithiol. Gyda’n gilydd rydym yn brwydo yn erbyn y Coronafeirws Covid-19

Arwyr y Fro (Cyngor Bro Morgannwg)

Wed, 17 Jun 2020 08:57:00 GMT

Mae Cyngor Bro Morgannwg wedi sefydlu Tîm Cymorth Argyfwng i ddarparu gwybodaeth a chefnogaeth, gan weithio'n agos gyda Gwasanaeth Gwirfoddol Bro Morgannwg , ac Age Connects Caerdydd a’r Fro i gyfeirio pobl i fudiadau a allai helpu. Mae Arwyr y Fro yn gronfa ddata y gellir ei chwilio, sy’n helpu i gysylltu unigolion mewn angen i gefnogaeth y sawl sy'n ei gynnig. Gall pobl gofrestru os oes angen cymorth arnynt gyda siopa bwyd neu gasgliadau meddyginiaeth, er enghraifft, fel y gall unigolion neu grwpiau helpu gyda’r fath dasgau. Ar hyn o bryd, mae nifer o bobl yn gwirfoddoli ar draws y Fro, gyda dros 2,000 o bobl yn cofrestru ers diwedd mis Mawrth pan darodd argyfwng Covid-19.

Mae Cronfa Grant Argyfwng hefyd wedi cael ei sefydlu i gynnig grantiau o hyd at £3,000 i grwpiau cymunedol, y sector gwirfoddol a chynghorau tref a chymuned, yn ogystal â busnesau cymwys.

Canolfannau Cydnerthedd Cymunedol (CBS Rhondda Cynon Taf)

Wed, 17 Jun 2020 08:54:00 GMT

Mae Cyngor Bwrdeistrefol Sirol Rhondda Cynon Taf wedi sefydlu saith Canolfan Cydnerthedd Cymunedol yn gyflym, sy’n cynnwys timau ‘rhithiol’ amlddisgyblaethol a sefydliadol o wasanaethau a phartneriaid y Cyngor, a arweinir gan Gydlynydd Cymunedol y Cyngor.

Mae’r Timau Cydnerthedd Cymunedol yn cysylltu â’r bobl sydd yn gofyn am gymorth, yn ogystal â’r sawl ar restr warchod y GIG, i ddarparu cefnogaeth gyda siopa, casglu presgripsiynau, cerdded cŵn a gwasanaethau cyfeillio, gan baru anghenion preswylwyr gyda gwirfoddolwyr lleol, grwpiau cymunedol, sefydliadau partner, neu drwy ddarparu cefnogaeth staff.

Hyd yma, mae dros 2,800 o breswylwyr wedi cael eu cefnogi gan y Canolfannau Cydnerthedd Cymunedol a bron i 11,000 o breswylwyr ar restr warchod y GIG wedi derbyn cyswllt dros y ffôn, gyda chynnig gweithredol o gefnogaeth.

Bu ymateb ysgubol gyda dros 1,100 cais am wirfoddolwyr, ac mae’r Cyngor wedi oedi recriwtio ar hyn o bryd wrth iddynt weithio i weithredu Gwirfoddolwyr Cydnerthedd Cymunedol mewn ymateb i’r galw lleol.

Cysylltwyr Cymunedol ym Mhowys (Cyngor Sir Powys)

jenna.redfern@wlga.gov.uk (Jenna Redfern) — Wed, 17 Jun 2020 08:51:00 GMT

Mae Cyngor Sir Powys, Bwrdd Iechyd Addysgu Powys a Chymdeithas Mudiadau Gwirfoddol Powys (PAVO), fel partneriaid allweddol Bwrdd Partneriaeth Ranbarthol Powys, wedi sefydlu Tîm Ymateb i Argyfwng Sector Cymunedol (CSERT) i gydlynu a chefnogi ymateb i argyfwng ar gyfer unigolion yn y gymuned efallai sydd wedi cael eu heffeithio gan COVID 19 drwy wirfoddolwyr ffurfiol ac anffurfiol. Mae CSERT, gyda chefnogaeth tri Cysylltwr Cymunedol ar ddeg, sydd wedi’u lleoli o amgylch y sir, yn trefnu cefnogaeth ymarferol i breswylwyr diamddiffyn (ar y rhestr gwarchod ac fel arall) gan wirfoddolwyr trwy rwydweithiau cefnogi lleol. Yn nhermau’r gwasanaeth a gynhigir drwy CSERT, darperir siopa, casgliadau meddyginiaethau, yn ogystal â gwasanaeth cyfeillio i fynd i’r afael ag unigedd ac arwahanrwydd cymdeithasol. Mae gan Bowys dros 4,000 o wirfoddolwyr ar draws y sir, ar unrhyw adeg. Mae CSERT wedi bod yn rhagweithiol iawn wrth gynyddu cefnogaeth gwirfoddol ffurfiol yn ystod yn pandemig.

Hwb Cymunedol Sir Benfro (Cyngor Sir Benfro)

Wed, 17 Jun 2020 08:49:00 GMT

Mae Hwb Cymunedol Sir Benfro yn siop un stop i unrhyw gymorth sydd ei angen yn ystod y pandemig presennol, o help gyda siopa i alwad ffôn cyfeillgar. Mae’n bartneriaeth rhwng Cyngor Sir Benfro, Cymdeithas Gwasanaethau Gwirfoddol Sir Benfro, Bwrdd Iechyd Prifysgol Hywel Dda a Llesiant Delta. Mae preswylwyr a fyddai’n hoffi gwirfoddoli yn cael eu cyfeirio at cyfeirlyfr rhyngweithiol ar y we o sefydliadau cymorth cymunedol sydd wedi cofrestru gyda PAVS, neu maen nhw’n gallu gwirfoddoli yn uniongyrchol trwy Gwirfoddoli Cymru. Mae 94 Grwpiau Cymorth Cymunedol wedi cofrestru gyda PAVS, a dros 600 o wirfoddolwyr wedi cofrestru gyda Gwirfoddoli Cymru.

Cyngor Dinas Casnewydd

Wed, 17 Jun 2020 08:47:00 GMT

Mae Cyngor Dinas Casnewydd wedi rhoi set gadarn o fecanweithiau cefnogaeth ymarferol ar waith i helpu’r rheiny yn y gymuned sydd fwyaf diamddiffyn. Mae hyn wedi bod o gymorth sylweddol gan y dull hyb cymunedol o weithio a weithredwyd i gefnogi tîm data gofodol y Cyngor. Mae’r Cyngor wedi cynnal ei canolfan gyswllt hollbwysig i barhau y gwasanaeth cefnogi, ac wedi sefydlu rhif ffôn am ddim i’r canolfannau. Gan weithio gyda Volunteer Matters a Chymdeithas Mudiadau Gwrifoddol Gwent (GAVO), mae gan Gasnewydd dros 300 o wirfoddolwyr yn gweithio o fewn y gymuned. Mae Cyngor Dinas Casnewydd yn gwella parseli bwyd gydag eitemau hanfodol ychwanegol. Mae’r cyngor yn helpu i ddarparu bwndeli babi (llefrith, clytiau, weips, ac ati) sydd wedi cael eu prynu ar gyfer dosbarthu i’r unigolion mwyaf diamddiffyn fel y nodwyd gan ymwelwyr iechyd, yn ogystal â phecynnau gweithgareddau i bobl ifanc, a phecynnau lles i breswylwyr hŷn.

Grŵp Cydlynwyr COVID-19 ar y Cyd (Cyngor Sir Ynys Môn)

Wed, 17 Jun 2020 08:42:00 GMT

Mae Cyngor Sir Ynys Mȏn wedi sefydlu grŵp Cydlynwyr Covid-19 ar y cyd ar draws sefydliadau Statudol a’r trydydd sector. Mae’r grŵp, wedi’i gadeirio gan Arweinydd y Cyngor yn rhan o ymateb yr ynys i’r pandemig. Mae’n cynnwys y Cyngor a’r trydydd sector dan arweiniad Medrwn Mȏn a Menter Mȏn sydd yn gweithio i baratoi adnoddau i grwpiau cymorth cymunedol Covid-19 ar yr ynys. Mae grŵp y cydlynwyr wedi datblygu canllawiau cymunedol Covid-19. Mae gan y cyngor 860 o wirfoddolwyr cofrestredig yn gweithredu mewn 36 o dimau ardal. Mae chwedeg o’r gwirfoddolwyr hyn yn cael eu cyfrif fel gwirfoddolwyr arbenigol gan fod ganddynt DBS cyfredol. Trwy gymorth cymunedol, grwpiau gwirfoddolwyr a gwasanaeth prydau ‘neges’ mae tua 675 o unigolion yn cael eu cefnogi, gyda 325 o unigolion pellach yn derbyn cymorth gyda gwasanaeth casglu presgripsiynau, siopa bwyd ac atgyfeiriadau i amryw o wasanaethau cymorth.

Cyngor Gwynedd

Wed, 17 Jun 2020 08:40:00 GMT

Mae Cyngor Gwynedd wedi adleoli 23 swyddog i greu Tîm Cymorth COVID a sefydlwyd i gysylltu ag, ac ymdrin ag ymholiadau gan breswylwyr sy’n ynysu a/neu’n pryderu am eu hamgylchiadau oherwydd COVID-19; mae’r manylion cyswllt ar gael ar wefan y Cyngor. O fewn 11 diwrnod cyntaf Ebrill, cafodd tîm y Cyngor dros 1,000 o alwadau gan unigolion yn hunan-ynysu ac o berygl sylweddol sydd ar y rhestr warchod. Roedd y galwadau yn ymdrin â chyngor, cofrestru ar gyfer y pecyn bwyd mewn argyfwng ac/neu i drefnu casgliad meddyginiaeth. Mae’r cynlluniau Cyfeillio yn cefnogi preswylwyr diamddiffyn gyda siopa, casglu meddyginiaethau, paratoi a danfon bwyd, ac ati. Ynghyd â Menter Môn, mae Cyngor Gwynedd wedi creu rhestr o fusnesau bwyd ar draws Gwynedd sy’n cynnig ystod eang o wasanaethau i gefnogi preswylwyr yn ystod y pandemig. Mae 600 o wirfoddolwyr wedi cofrestru i Fanc Gwirfoddoli y Cyngor Gwirfoddoli Lleol, Mantell Gwynedd.

Ceredigion

Wed, 17 Jun 2020 08:30:00 GMT

Mae Cyngor Sir Ceredigion wedi bod yn gweithio mewn partneriaeth gyda Chymdeithas Mudiadau Gwirfoddol Ceredigion (CAVO) i gydlynu ymateb gwirfoddolwyr i COVID-19. Mae proses glir wedi bod ar waith i unigolion sy’n dymuno gwirfoddoli mewn gwahanol gymunedau, lle mae CAVO yn ‘paru’ gwirfoddolwyr gyda grwpiau neu fudiadau. Ar 24 Ebrill, 2020, roedd 192 o wirfoddolwyr wedi cofrestru i ymateb i COVID-19. Mae CAVO a’r Cyngor yn gweithio mewn partneriaeth i ddiweddaru’r rhestr adnoddau dair gwaith yr wythnos. Mae'r rhestr ar gael ar wefan yr Awdurdod Lleol, ac mae’n cynnwys cyfeiriadur o gyflenwadau bwyd, siopa a chasgliadau presgripsiwn, a grwpiau cefnogi ymhob cymuned ar draws Ceredigion.

Ap Cefnogaeth Gymunedol Torfaen (CBS Torfaen)

Wed, 17 Jun 2020 08:28:00 GMT

Mae Cyngor Torfaen wedi lansio Ap Cefnogaeth Gymunedol Torfaen ar 27 Ebrill, 2020 i helpu gyda chofrestriad cyflym a rhwydd gwirfoddolwyr sydd eisiau cynnig eu hamser, a helpu preswylwyr mwyaf diamddiffyn Torfaen i gofrestru ar gyfer cefnogaeth, yn ogystal â’u galluogi i gael y ddarpariaeth fwyaf addas iddynt. Bydd preswylwyr sy’n cofrestru i ddefnyddio’r ap yn gallu gwneud ceisiadau am: gasgliad meddyginiaeth; siopa bwyd, ac eitemau hanfodol eraill, y gwasanaeth cyfeillio, ac ati. Datblygwyd yr ap gan Syncsort, sef yn o bartneriaid technoleg y Cyngor. Bydd yr ap o gymorth i'r Hwb Cymorth Cymunedol a sefydlwyd yn ddiweddar, i weithredu’n fwy effeithiol, a bydd o gymorth arbennig pan mae anghenion preswylwyr yn cynyddu, ac wrth i sgiliau ac argaeledd gwirfoddolwyr newid dros amser. Mae’r Cyngor, gyda chymorth partneriaid, gan gynnwys Bron Afon ac Ymddiriedolaeth Hamdden Torfaen , yn ogystal â grwpiau cymunedol a gwirfoddolwyr sy’n cydlynu ac yn darparu cefnogaeth uniongyrchol. Mae fersiwn ar-lein o’r ap hefyd, sydd ar gael ar dudalen Covid-19 gwefan y Cyngor i’r sawl nad oes ganddynt fynediad i ddyfais symudol. Os nad oes gan breswylwyr fynediad i’r we, mae modd iddynt ffonio 01495 762200 am gymorth. Mae gan Gyngor Torfaen fwriad i ddefnyddio'r ap yn y tymor hir i gefnogi gwasanaethau gyda chydlynu Gwirfoddolwyr, ar ôl Covid19.

Ein Sir Fynwy (Cyngor Sir Fynwy)

Wed, 17 Jun 2020 08:25:00 GMT

Mae Tîm Cefnogaeth Gymunedol Cyngor Sir Fynwy yn ‘asesu’r angen’, ac mewn partneriaeth gyda gwirfoddolwyr, maent yn cynnig ystod eang o wasanaethau cefnogi, megis: casglu a danfon siopa a meddyginiaethau, darparu parseli bwyd a phrydau parod i’r sawl sydd eu hangen, gwasanaethau cyfeillio, ac ati.

Mae cyfrwng digidol https://ourmonmouthshire.org wedi cael ei ddatblygu i gyd-fynd â’r gweithgareddau presennol, a fydd yn cynnwys swyddogaeth bancio amser. Mae dros 1000 o wirfoddolwyr yn weithredol o fewn y sir. Mae’r Timau Datblygu Ardal wedi llunio darlun o ofynion gwirfoddoli ar gyfer pob un o’r 60 + grŵp gweithredu yn y gymuned sy’n cael eu cefnogi gan y cyngor a phartneriaid allweddol i gyfuno ymateb a galw gwirfoddolwyr.

Gyda’n Gilydd dros Gaerdydd (Cyngor Caerdydd)

Tue, 16 Jun 2020 23:00:00 GMT

Sefydlwyd cynllun Gyda'n Gilydd dros Gaerdydd, Cyngor Caerdydd ar ddechrau argyfwng COVID-19. Mae 1,200 nawr wedi cofrestru gyda’r cynllun, sydd wedi gweithredu fel gwasanaeth brocer, i gyfuno pobl sy’n dymuno helpu gyda chyfleoedd gwirfoddoli ar draws y ddinas. Mae Gwirfoddoli Caerdydd a ddatblygwyd mewn partneriaeth gyda sefydliadau y trydydd sector yn cynnig cyfleuster chwilio ar-lein am sefydliadau a busnesau lleol sy’n danfon nwyddau at y stepen drws, a lle gall breswylwyr gofrestru i wirfoddoli. Mae gwaith yn mynd rhagddo i sefydlu rhwydwaith o sefydliadau angor h.y. sefydliadau cymeradwyedig a sefydledig, i gefnogi y nifer o sefydliadau newydd sy'n cael eu creu mewn ymateb uniongyrchol i bandemig COVID-19.

Gan weithio gyda staff y Cyngor, mae gwirfoddolwyr yn chwarae rôl bwysig wrth baratoi a dosbarthu bwyd a nwyddau hanfodol mewn parseli argyfwng i bobl sy’n profi anawsterau yn ystod y pandemig oherwydd eu bod yn hunan-ynysu, neu oherwydd effaith ariannol yr argyfwng. Mae gan Dîm bwyd y Cyngor ychydig dan 1,200 o wirfoddolwyr ac maent yn dibynnu ar rhwng 10-15 o wirfoddolwyr y dydd i godi, pacio a danfon bwyd.