Y Cynghorydd Andrew Morgan OBE, Arweinydd Grŵp Llafur:

"Rydym yn croesawu'r cyhoeddiad heddiw ar ddiwygio system y dreth gyngor sydd wedi bod angen diweddariad am amser hir. Dylai'r diwygiad hwn helpu i sicrhau ei fod yn decach ac yn fwy cynaliadwy. Mae'n dda gweld bod y penderfyniad hwn yn dod ar ôl ymgynghori helaeth gan fod angen iddo adlewyrchu lleisiau cynghorau a phobl Cymru. Rhaid i unrhyw newidiadau a wneir roi blaenoriaeth i les ein cymunedau a diogelu gwasanaethau lleol hanfodol."

Y Cynghorydd Mark Pritchard, Arweinydd Grŵp Annibynnol:

“Mae’r dirwedd ariannol bresennol, ar gyfer cynghorau a dinasyddion yn bendant yn llwm ac felly mae’n rhaid i unrhyw benderfyniadau ar y trethi y mae unigolion a theuluoedd yn eu talu gael eu gwneud trwy gydweithio ystyrlon a rhaid iddynt fod yn dryloyw. Mae’n gywir fod trethdalwyr yn cael cyfle rheolaidd i ymgysylltu â’r broses ailbrisio ac rwy’n falch o weld bod y Bil hwn yn caniatáu hynny. Yn fy marn i, byddai wedi bod yn well i’r diwygiad hwn ddigwydd yn gynharach na’r amserlen a awgrymwyd yn 2028, ond rwy’n cydnabod bod yn rhaid i’r Llywodraeth wrando ar y consensws cyffredinol a adlewyrchir ym mhob ymgynghoriad ystyrlon.”

Y Cynghorydd Llinos Medi, Arweinydd Grŵp Plaid Cymru:

"Mae cyhoeddi amserlen ar gyfer diwygio'r dreth gyngor yn gam sylweddol ymlaen wrth fynd i'r afael ag anghenion esblygol ein cymunedau. Mae ymrwymo i ailbrisio rheolaidd a gweithredu gwelliannau erbyn diwedd tymor presennol y Senedd yn rhan allweddol o'n Cytundeb Cydweithredu gyda Llywodraeth Cymru ac yn dangos ein hymroddiad i greu system drethiant ymatebol.”

Y Cynghorydd Andrew Parkhurst, Arweinydd Grŵp y Democratiaid Rhyddfrydol:

“Mae pob awdurdod lleol yn gytûn bod angen treth gyngor decach. Mae’r diwygiad hwn yn enghraifft wych o Lywodraeth Cymru a llywodraeth leol yn cydweithio ar gyfer cymunedau Cymru, fel y gwelsom yn y gweithgorau a’r fforymau partneriaeth niferus a helpodd i lunio’r newid hwn.”

DIWEDD –

Daeth cynrychiolwyr o bob rhan o wasanaethau llywodraeth leol, megis addysg, tai, a gwasanaethau cymdeithasol yn ogystal â’r sector gwirfoddol at ei gilydd yn y gynhadledd i drafod nifer o bynciau cysylltiedig pwysig gan gynnwys canllawiau newydd Llywodraeth Cymru ar gyfer adnabod yn gynnar pobl ifanc mewn perygl sydd ddim mewn addysg, cyflogaeth na hyfforddiant) a rôl Gwaith Ieuenctid yn ymgynghoriad presennol Llywodraeth Cymru ar ddod â digartrefedd i ben yng Nghymru.

Dywedodd y Cynghorydd Andrea Lewis, Llefarydd WLGA dros Dai:

“Rwy’n falch iawn bod WLGA wedi cefnogi’r digwyddiad hwn. Roedd y gynhadledd yn llwyddiant mawr a rhoddodd lwyfan gwerthfawr i lywodraeth leol a phartneriaid gymryd rhan mewn trafodaethau ystyrlon ar faterion tai dybryd.

“Mae nifer yr unigolion sy’n ceisio cymorth tai gan gynghorau lleol a’r niferoedd digynsail mewn llety dros dro brys yn tanlinellu’r heriau tai brys y mae ein cymunedau’n eu hwynebu.

“Er gwaethaf y cyfyngiadau ariannol cyffredinol, na wnaeth Datganiad yr Hydref diweddar Llywodraeth y DU fawr ddim i fynd i’r afael â nhw, rydym yn croesawu bod Llywodraeth Cymru yn blaenoriaethu’r frwydr yn erbyn digartrefedd.

“Mae WLGA yn parhau i fod yn ymrwymedig i gydweithio â’r Llywodraeth i sicrhau bod cymorth ac atebion digonol yn eu lle i fynd i’r afael â’r heriau tai a digartrefedd sy’n wynebu ein cymunedau.”

DIWEDD –